Amira Willighagen bederf die gehoor met die mooiste geskenke: die geskenk van liefde, die geskenk van musiek, die geskenk van reis, die geskenk van al die herinneringe wat musiek bring en ja, natuurlik ook die geskenk van Kersfees! Hierdie weldeurdagte, keurig saamgestelde musieksamestelling is net so opwindend en verassend soos die ontvangs en oopmaak van ’n hoop geskenke en elkeen in die gehoor sal stil-tevrede glimlag as hulle gunstelinge gehoor word tussen al die bekende melodië uit musikale blyspele, operettes, bekende gunsteling, ’n tikkie opera en die mooiste en bekendste Kersmusiek. Vir die eerste keer op die verhoog van Helderberg Teatro kan daar werklik uitgesien word na ’n oorvloed geskenke as  hierdie uiters talentvolle, Holland’s Got Talent Wenner (op die ouderdom van 9 jaar) die gehoor meevoer met haar artistieke briljansie en sprankelende menswees. Soos ’n tevrede kind op Kersdag, sal elke lid in die gehoor met ’n gunsteling geskenk in die hart huistoe gaan.