Helene Bester sing Nana Mouskouri

Helenè Bester bring in haar produksie Helenè Bester sing Nana Mouskouri ’n huldeblyk aan die bekende Griekse sangeres wat wêreldwyd gehore geraak het. Met teks en regie deur Frans Swart van Lefra Produksies en musiekregie deur Heinrich Pelser, bied die produksie ’n musiekervaring met ’n nostalgiese aanslag. “Ek het nog altyd daarvan gedroom om ’n Nana-vertoning te doen,” sê Helenè. “Ek is baie lief vir haar stem, en my sussie en ek het met haar musiek grootgeword. Ons het selfs gedink sy is ’n vriendin van my ma omdat hulle eenders lyk,” lag sy. “Die tyd voel nou reg. Vyftien jaar gelede sou ek nie dieselfde diepte kon gee nie, maar my stem het ontwikkel en pas nou beter by haar styl.” Helenè het haar voorberei deur Mouskouri se optredes en video’s te bestudeer. “Ek het gekyk hoe sy beweeg en met ’n gehoor werk. Jy wil die huldeblyk eerlik en respekvol hou.” Regisseur Frans Swart sê: “Toe Helenè my met die idee nader, was ek dadelik opgewonde. Min kunstenaars kan reg laat geskied aan Nana Mouskouri se nalatenskap, en Helenè is een van hulle.”

Fairtree Atterbury Theatre — Fairtree Atterbury Theatre, Pretoria